ਬੱਚੇ ਨੂੰ ਸਮਝਾਉਣ ਦਾ ਤਰੀਕਾ

ਬ

ਮਿਰਜ਼ਾਪੁਰ ਦੇ ਇਕ ਸਕੂਲ ਦੇ ਹੈੱਡਮਾਸਟਰ ਵੱਲੋਂ ਦੂਜੀ ਦੇ ਵਿਦਿਆਰਥੀ ਸੋਨੂੰ ਯਾਦਵ ਨੂੰ ਵੀਰਵਾਰ ਸਕੂਲ ਦੀ ਸਭ ਤੋਂ ਉਤਲੀ ਮੰਜ਼ਲ ਤੋਂ ਪੁੱਠਾ ਲਟਕਾਉਣ ਦਾ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਹੈੱਡਮਾਸਟਰ ਮਨੋਜ ਵਿਸ਼ਵਕਰਮਾ ਨੂੰ ਗਿ੍ਫਤਾਰ ਕਰ ਲਿਆ ਗਿਆ | ਜਦੋਂ ਸੋਨੂੰ ਰੋ ਰਿਹਾ ਸੀ ਤਾਂ ਹੈੱਡਮਾਸਟਰ ਧਮਕਾ ਰਿਹਾ ਸੀ ਕਿ ਜੇ ਉਸ ਨੇ ਲੰਚ ਬਰੇਕ ਦੌਰਾਨ ਇਕ ਵਿਦਿਆਰਥੀ ਨੂੰ ਦੰਦੀ ਵੱਢਣ ਦੀ ਮੁਆਫੀ ਨਾ ਮੰਗੀ ਤਾਂ ਉਹ ਉਸ ਨੂੰ ਭੁੰਜੇ ਸੁੱਟ ਦੇਵੇਗਾ | ਸੋਨੂੰ ਦੀਆਂ ਚੀਕਾਂ ਸੁਣ ਕੇ ਜਦ ਕਈ ਵਿਦਿਆਰਥੀ ਇਕੱਠੇ ਹੋ ਗਏ ਤਾਂ ਜਾ ਕੇ ਹੈੱਡਮਾਸਟਰ ਨੇ ਉਸ ਨੂੰ ਛੱਡਿਆ | ਸੋਨੂੰ ਦੇ ਪਿਤਾ ਨੇ ਕਿਹਾ ਕਿ ਗੁਰੂ ਜੀ ਨੇ ਜੋ ਕੀਤਾ, ਉਹ ਗਲਤ ਸੀ, ਪਰ ਉਨ੍ਹਾ ਪਿਆਰ ਨਾਲ ਕੀਤਾ, ਇਸ ਕਰਕੇ ਉਨ੍ਹਾ ਨੂੰ ਗੁਰੂ ਜੀ ‘ਤੇ ਕੋਈ ਗਿਲਾ ਨਹੀਂ | ਹੈੱਡਮਾਸਟਰ ਨੇ ਕਿਹਾ ਕਿ ਸੋਨੂੰ ਦੇ ਪਿਤਾ ਨੇ ਹੀ ਉਸ ਨੂੰ ‘ਠੀਕ’ ਕਰਨ ਲਈ ਕਿਹਾ ਸੀ | ਉਹ ਬਹੁਤ ਸ਼ਰਾਰਤੀ ਹੈ ਤੇ ਵਿਦਿਆਰਥੀਆਂ ਤੋਂ ਇਲਾਵਾ ਟੀਚਰਾਂ ਨੂੰ ਵੀ ਦੰਦੀ ਵੱਢ ਦਿੰਦਾ ਹੈ | ਉਸ ਨੂੰ ਡਰਾਉਣ ਲਈ ਹੀ ਉਨ੍ਹਾ ਉਸ ਨੂੰ ਪੁੱਠਾ ਲਟਕਾਇਆ |