ਬਸਪਾ 21 ਨੂੰ ਮੁੜ ਜਾਰੀ ਕਰੇਗੀ ਉਮੀਦਵਾਰਾਂ ਦੀ ਸੂਚੀ

ਬ

ਜਲੰਧਰ (ਹਰਸ਼ ਗੋਗੀ) ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਬਹੁਜਨ ਸਮਾਜ ਪਾਰਟੀ ਦੇ 20 ਉਮੀਦਵਾਰਾਂ ਦੀ ਸੂਚੀ 21 ਜਨਵਰੀ ਨੂੰ ਫਿਰ ਤੋਂ ਜਾਰੀ ਹੋਵੇਗੀ। ਹਾਲਾਂਕਿ ਪਾਰਟੀ ਨੇ ਜ਼ਿਆਦਾਤਰ ਸੀਟਾਂ ’ਤੇ ਪਹਿਲਾਂ ਹੀ ਉਮੀਦਵਾਰ ਐਲਾਨ ਦਿੱਤੇ ਹਨ। ਪੰਫਲੇਟ ਤੇ ਬੈਨਰਾਂ ’ਤੇ ਉਨ੍ਹਾਂ ਦੀਆਂ ਤਸਵੀਰਾਂ ਛਪ ਚੁੱਕੀਆਂ ਹਨ ਅਤੇ ਉਹ ਬਤੌਰ ਉਮੀਦਵਾਰ ਪ੍ਰਚਾਰ ਵੀ ਕਰ ਰਹੇ ਹਨ। ਇਸ ਦੇ ਬਾਵਜੂਦ ਪਾਰਟੀ ਉਮੀਦਵਾਰਾਂ ਵਿਚ ਬਦਲਾਅ ਕਰ ਸਕਦੀ ਹੈ। ਬਸਪਾ ਪੰਜਾਬ, ਹਰਿਆਣਾ ਤੇ ਚੰਡੀਗੜ੍ਹ ਦੇ ਇੰਚਾਰਜ ਰਣਧੀਰ ਸਿੰਘ ਬੈਨੀਵਾਲ ਨੇ ਅਧਿਕਾਰਤ ਤੌਰ ’ਤੇ ਇਸ ਦੀ ਪੁਸ਼ਟੀ ਕੀਤੀ। ਉਨ੍ਹਾਂ ਕਿਹਾ ਕਿ ਪਾਰਟੀ ਦੀ ਰਾਸ਼ਟਰੀ ਪ੍ਰਧਾਨ ਮਾਇਆਵਤੀ ਦੇ ਆਦੇਸ਼ਾਂ ਅਨੁਸਾਰ ਸਾਰੇ 20 ਉਮੀਦਵਾਰਾਂ ਦੀ ਸੂਚੀ 21 ਜਨਵਰੀ ਨੂੰ ਜਾਰੀ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਵਿਧਾਨ ਸਭਾ ਚੋਣਾਂ ਸ਼੍ਰੋਮਣੀ ਅਕਾਲੀ ਦਲ ਨਾਲ ਗੱਠਜੋੜ ਕਰਕੇ ਲੜੀਆਂ ਜਾ ਰਹੀਆਂ ਹਨ। ਗੱਠਜੋੜ ’ਚ ਬਸਪਾ 20 ਸੀਟਾਂ ’ਤੇ ਆਪਣੇ ਉਮੀਦਵਾਰ ਖੜ੍ਹੇ ਕਰ ਰਹੀ ਹੈ। ਹਾਲਾਂਕਿ ਬਸਪਾ ਵੱਲੋਂ ਜਿਨ੍ਹਾਂ ਸੀਟਾਂ ਉੱਪਰ ਚੋਣ ਲੜੇ ਜਾਣ ਦਾ ਐਲਾਨ ਹੋ ਰਿਹਾ ਸੀ, ਉਨ੍ਹਾਂ ਨੂੰ ਲੈ ਕੇ ਬਸਪਾ ਦੇ ਅੰਦਰ ਵੀ ਵਿਰੋਧ ਪੈਦਾ ਹੋਇਆ ਸੀ। ਦੋਸ਼ ਇਹ ਲਗਾਇਆ ਜਾ ਰਿਹਾ ਸੀ ਕਿ ਗੱਠਜੋੜ ਤਹਿਤ ਬਸਪਾ ਵੱਲੋਂ ਉਨ੍ਹਾਂ ਸੀਟਾਂ ’ਤੇ ਚੋਣਾਂ ਹੀ ਨਹੀਂ ਲੜੀਆਂ ਜਾ ਰਹੀਆਂ ਜਿੱਥੇ ਬਸਪਾ ਦਾ ਆਧਾਰ ਹੈ ਅਤੇ ਜਿੱਤ ਦੀ ਸੰਭਾਵਨਾ ਹੈ। ਇਸੇ ਵਿਰੋਧ ਦੇ ਚੱਲਦਿਆਂ ਕੁਝ ਟਕਸਾਲੀ ਸੀਨੀਅਰ ਨੇਤਾ ਪਾਰਟੀ ਨੂੰ ਛੱਡ ਕੇ ਕਾਂਗਸ ਤੇ ਹੋਰ ਪਾਰਟੀਆਂ ਵਿਚ ਸ਼ਾਮਲ ਹੋ ਰਹੇ ਹਨ।